Blog - Masonry Boxed

„Mikil kaflaskil“ Rut Ingólfsdóttir í viðtali, Morgunblaðið

0

Rut Ingólfsdóttir fiðluleikari kveður Kammersveit Reykjavíkur eftir 42 ára starf með útgáfu bókarinnar Þegar draumarnir rætast. Einnig koma út á þessu ári fimm diskar með upptökum Kammersveitarinnar sem teknir voru upp að frumkvæði Rutar.

Skoða viðtalið sem pdf hér:

bls. 1 2016-12-03-all-94

bls. 2 2016-12-03-all-94

Nýr geisladiskur Kammersveitar Reykjavíkur

0

Út er kominn geisladiskurinn Kvöldstund með Beethoven og Dvořák í flutningi Kammersveitar Reykavíkur.
Á efnisskrá disksins er Sextett fyrir tvö horn og strengjakvartett í Es-dúr op.81b eftir L. v. Beethoven og Serenaða fyrir blásara, selló og kontrabassa í d-moll op. 44 eftir A. Dvořák.

Diskurinn er gefinn út af Smekkleysu eins og flestir geisladiskarnir í 26 diska útgáfusafni Kammersveitarinnar.

Kvöldstund með Beethoven og Dvořák er, eins og aðrir diskar Kammersveitarinnar, fáanlegur í verslun Smekkleysu á Laugavegi 35 og víða á netinu s.s. á Amazon. Kammersveitin hefur undanfarið gefið út geisladiska með klassískum verkum, m.a. Brandenborgarkonserta Bachs en fyrir þá útgáfu hlaut Kammersveitin Íslensku tónlistarverðlaunin 2003.

Sextettinn er í klassískum stíl og var saminn árið 1794-5, stuttu eftir að hinn ungi Beethoven hafði flutt búferlum til Vínarborgar. Líklegt er að Beethoven hafi þekkt bestu hljóðfæraleikara síns tíma í Vínarborg miðað við erfiðleikastig Sextettsins. Hægi þátturinn gefur hornleikurunum tækifæri til að láta hljóðfærið syngja en í lokakaflanum teflir Beethoven fram veiðmannastefi í anda Mozarts sem lést aðeins fáum mánuðum áður en Beethoven kom til Vínarborgar.

Dvořák samdi Serenöðuna snemma árs 1878. Auljóst er að tónlist Mozarts og Beethovens fyrir blásara hefur haft mikil áhrif á Dvořák. En við hið þrautreynda tónlistarform bætti tónskáldið þjóðlögum frá heimalandi sínu Bóhemíu og til varð ný tegund tónlistar ekki einungis ætluð hástéttinni heldur öllum almenningi, hann gæti einnig skilið og notið tónlistarinnar.

Flytjendur Kammersveitar Reykjavíkur á diskinum eru Daði Kolbeinsson og Peter Tompkins, óbó,  Einar Jóhannesson og Rúnar Óskarsson, klarinett, Rúnar H. Vilbergsson og Darri Mikaelsson, fagott, Brjánn Ingason, kontrafagott, Joseph Ognibene, Emil Friðfinnsson og Þorkell Jóelsson, horn, Rut Ingólfsdóttir og Júlíana Elín Kjartansdóttir, fiðla, Sarah Buckley, víóla, Inga Rós Ingólfsdóttir og Sigurður Bjarki Gunnarsson, selló og Richard Korn, kontrabassi.

Þú munt dá Brahms, gagnrýni í Fréttablaðinu

0

Þú munt dá Brahms

Kvöldstund með Brahms. Kammersveit Reykjavíkur. Útg. Smekkleysa

5 stjörnur

Einn merkilegasti geisladiskur ársins á Íslandi er Kvöldstund með Brahms með Kammersveit Reykjavíkur. Nú er vissulega ekkert frumlegt við diskinn. Það eru engar nýjar tónsmíðar á honum, ekkert sniðugt konseft sem æpir á athygli. Kápan er ekki heldur neitt sem maður tekur eftir. Þar er bara ljósmynd af tónskáldinu, ein af mörgum sem hafa birst ótal sinnum. Svo hvað er svona spennandi við geisladiskinn?

Jú, það er hversu góður hann er. Nú eru til fullt af upptökum með erlendum öndvegismúsíköntum þar sem þeir flytja verkin á diskinum, en Kammersveitin stendur þeim fyllilega jafnfætis. Tæknilega séð er flutningurinn óaðfinnanlegur. Hornleikur Josephs Ognibenes í horntríóinu opus 40 er svo fagur að hann er eins og rödd úr himnaríki. Söngur Rannveigar Fríðu Bragadóttur í tveimur sönglögum opus 91 er þéttur og öruggur. Samspilið í strengjasextett opus 18 er nákvæmt og fágað, sveitin leikur líkt og einn maður. Meira að segja pizzicatóið, þ.e. strengjaplokkið í lok fyrsta kaflans er eins nálægt fullkomnun og hægt er að hugsa sér.

Það er samt ekki málið. Að sjálfsögðu þarf tæknin að vera pottþétt. En ef rétta tilfinningin er ekki í túlkuninni hafa tæknilegir yfirburðir litla þýðingu. Hér er Kammersveitin stöðugt að segja sögu. Hver einasti tónn hefur merkingu. Tónlistarfólkinu liggur það mikið á hjarta að hlustandinn hrífst með. Tónlistin er svo falleg að ekki er annað hægt en að loka augunum og gefa sig skáldskápnum á vald. Brahms er dásamlegur á þessum geisladiski.

Niðurstaða: 

Algerlega frábær geisladiskur með tímalausum upptökum á tónlist Brahms.