Tónleikaárið 2018-2019

Sagan af dátanum

Í Norðurljósum, Hörpu, 23. september 2018 – kl. 16:00

Á “Sígildum sunnudögum”, tónleikaröð Hörpu

Kaupa miða

Á fyrstu tónleikum starfsársins leikur Kammersveit Reykjavíkur Söguna af dátanum eftir Igor Stravinsky. Sögumaður er Jóhann Sigurðarson og stjórnandi er Bjarni Frímann Bjarnason. Verkið var frumflutt fyrir 100 árum síðan, eða þann 28. september 1918 í Lausanne í Sviss. Verkið samdi Stravinsky við texta eftir C.F. Ramuz, sem byggði söguna á gamalli rússneskri þjóðsögu en íslenska þýðingu gerði Þorsteinn Valdimarsson. Hermaðurinn Jósef er á leið heim í stutt frí. Á leiðinni sest hann niður til að leika á fiðluna sína þegar Kölski, í gervi gamals manns, býður honum uppá skipti; Kölski fær fiðluna í skiptum fyrir bók sem á að færa þeim sem kann með að fara, óendanleg auðævi. Jósef gengur að samningnum en kemst fljótt að því að auðurinn færir honum ekki hamingju. Hann losar sig við bókina og kaupir fiðluna aftur, en viðskiptum hans og Kölska er þó langt frá því að vera lokið. Sagan er áminning um að hamingjan verður ekki keypt þrátt fyrir öll heimsins auðævi, og á jafn vel við nú og fyrir 100 árum þegar verkið var frumflutt.


Bach, Bach og Telemann

Faðir sonur og guðfaðir

Jólatónleikar Kammersveitar Reykjavíkur Í Norðurljósum, Hörpu, 2. desember 2018 – kl. 16:00

Á „Sígildum sunnudögum,“ tónleikaröð Hörpu.

Kaupa miða

Svo árum skiptir hefur Kammersveit Reykjavíkur glatt tónleikagesti með jólatónleikum sínum. Eftir tónleika til fjölda ára í Áskirkju hefur sveitin nú flutt jólatónleika sína í Hörpu og eru þeir orðnir ómissandi hluti fjölbreyttrar tónleikaflóru hússins á aðventunni.

Tónleikarnir í ár eru sérlega glæsilegir. Sveitin mun flytja fjölbreytt verk eftir þrjá meistara barokktímans. Þá J.S Bach, C.P.E Bach og G.Ph Telemann. Sveitin fær til sín góða gesti, þau Inês d’Avena blokkflautuleikara og Claudio Ribeiro semballeikara, en þau eru bæði búsett í Hollandi og starfa við flutning barokktónlistar. Að auki leika Dai Yuan fagottleikari og Áshildur Haraldsdóttir flautuleikari, meðlimur Kammersveitarinnar, einleik á tónleikunum.
Á efniskránni má meðal annars finna tríósónötur, konserta og hina rómuðu hljómsveitarsvítu J.S Bachs nr. 1.


Lokatónleikar Myrkra músíkdaga

Í Kaldalóni, Hörpu, 2. febrúar 2019 – kl. 21:00

Kammersveitin slær lokahljóm Myrka músíkdaga að vanda. Á efnisskrá eru verk eftir góða vini Kammersveitarinnar eins og Huga Guðmundsson, Önnu Þorvaldsdóttur og Steingrím Rohloff, en einnig mun sveitin flytja í fyrsta sinn verk eftir Helga Rafn Ingvarsson og nýliðann Ingibjörgu Ýri Skarphéðinsdóttur.
Efnisskrá:
Hugi Guðmundsson: Eq. IV: Windbells (2005)
Ingibjörg Ýr Skarphéðinsdóttir: að elska er að sökkva (2018), frumflutningur
Helgi Rafn Ingvarsson: Vefur / Loom (2018), frumflutningur
Anna Þorvaldsdóttir: Fields (2016), frumflutningur á Íslandi
Steingrímur Rohloff: The Sinus Experience (2007)

Lítið eitt um verkin:
Eq. IV: Windbells var pantað af Caput fyrir heimssýninguna í Japan 2005. Verkið var valið fyrir Íslands hönd á Rostrum tónskáldaþingið í Lisabon 2006 og hlaut þar viðurkenningu í báðum flokkum keppninnar.
að elska er að sökkva var skrifað fyrir Kammersveit Reykjavíkur haustið 2018. Titill verksins er fenginn úr ljóði X. úr ljóðabókinni Vistarverur eftir Hauk Ingvarsson en brot úr því kemur fyrir í verkinu ásamt upphafi ljóðsins VI. Verkið er skrifað fyrir flautu, klarinett, fiðlu, kontrabassa og uppmagnaðan kaktus.
Vefur er impressjónísk tónsmíði. Kona situr við vefstól og vefur klæði.
Fields var pantað af Villa Musica Rheinland-Pfalz stofnuninni fyrir tónlistarhópinn Bang on a Can All-Stars. Það var frumflutt í Frankfurter Hof salnum í Mainz 2016.
The Sinus Experience var skrifað fyrir tónlistarhópinn Caput árið 2006.

Flytjendur á tónleikunum:
Áshildur Haraldsdóttir – flauta/bassaflauta, Rúnar Óskarsson – klarinett/bassaklarinett, Una Sveinbjarnardóttir – fiðla, Hrafnkell Orri Egilsson – selló, Richard Korn – kontrabassi, Guðmundur Pétursson – gítar, Frank Aarnink – slagverk, Anna Guðný Guðmundsdóttir – píanó, Bjarni Frímann Bjarnason – stjórnandi.

Miðaverð 3500kr
Tilboð á tix.is til 1. janúar. Hátíðarpassi sem gildir á alla viðburði Myrkra músíkdaga á 10.000kr

Viðburðurinn á Facebook
Myrkir músíkdagar


Kammersveitin flytur kammersinfóníur

Í Norðurljósum, Hörpu, 17. mars 2019 – kl. 16:00

Á „Sígildum sunnudögum,“ tónleikaröð Hörpu.